‘ఫెడరేషన్ ఆఫ్ ప్రెస్ క్లబ్స్’ను ప్రారంభించిన ‘భట్టి’

• హైదరాబాద్‌లో దేశవ్యాప్తంగా ఎనిమిది ప్రెస్ క్లబ్‌ల ప్రతినిధులతో ఏర్పాటైన క్లబ్
• ప్రజాస్వామ్య మనుగడకు, పాలకులను ప్రశ్నించే పత్రికా స్వేచ్ఛ అత్యంత కీలకమన్న భట్టి

హైదరాబాద్ (సింగిడి): దేశవ్యాప్తంగా ఉన్న ఎనిమిది ప్రెస్ క్లబ్ ల ప్రతినిధులతో హైదరాబాద్ లో Federation of Press Clubs ఏర్పాటైంది. తెలంగాణ ఉపముఖ్యమంత్రి భట్టి విక్రమార్క మల్లు ఈ క్లబ్ ను లాంఛనంగా ప్రారంభించారు. భారత స్వాతంత్రోద్యమం నుంచి నేటి వరకు ప్రజా చైతన్యంలో జర్నలిజం కీలక పాత్ర పోషించిందని భట్టి విక్రమార్క గుర్తుచేశారు. మహాత్మా గాంధీ, డాక్టర్ బి.ఆర్. అంబేద్కర్, లోకమాన్య తిలక్ వంటి మహనీయులు పత్రికలను సామాజిక, రాజకీయ మార్పుకు సాధనాలుగా మలిచారని పేర్కొన్నారు.

“ఈ కాలంలో సమాచార కొరత లేదు.. నమ్మకం కొరత ఉంది” అని ఆయన అన్నారు. ఆర్టిఫిషియల్ ఇంటెలిజెన్స్, వాయిస్ క్లోనింగ్ వంటి సాంకేతికతలతో తప్పుడు సమాచారం వేగంగా వ్యాప్తి చెందుతున్న సమయంలో జర్నలిస్టుకు అత్యంత విలువైన ఆస్తి విశ్వసనీయత అని స్పష్టం చేశారు.

ముఖ్యంగా జిల్లా, గ్రామీణ ప్రాంతాల్లో పనిచేస్తున్న జర్నలిస్టులు ప్రజల సమస్యలను ప్రభుత్వ దృష్టికి తీసుకువస్తూ ప్రభుత్వానికి *‘అత్యుత్తమ ముందస్తు హెచ్చరిక వ్యవస్థ’*గా పనిచేస్తున్నారని భట్టి విక్రమార్క అన్నారు. జర్నలిస్టుల భద్రత, గౌరవం, ఉద్యోగ పరిస్థితులు, సంక్షేమం, వృత్తిపరమైన ప్రమాణాల పరిరక్షణకు ఫెడరేషన్ ప్రత్యేక దృష్టి పెట్టాలని సూచించారు.

అధికారంలో ఉన్నవారిని ప్రశ్నిస్తూ, అదే సమయంలో తమ వృత్తి ప్రమాణాలను కూడా కాపాడుకోవాలని జర్నలిస్టులకు ఆయన పిలుపునిచ్చారు. పాలకులను జవాబుదారీగా ఉంచడంతో పాటు, జర్నలిస్టులు తమను తాము వృత్తి ప్రమాణాలకు జవాబుదారీగా ఉంచుకోవాలని అన్నారు.

కొండా సుష్మిత లైన్ దాటింది: https://whatsapp.com/channel/0029Vb8cjPLDuMRe4oW2W02i

Federation of Press Clubs ప్రారంభోత్సవం: తెలంగాణ గడ్డపై అది ఉంది

తెలంగాణ గడ్డ స్వభావంలోనే స్వేచ్ఛగా మాట్లాడే, ప్రశ్నించే సంప్రదాయం ఉందని భట్టి విక్రమార్క పేర్కొన్నారు. తమతో విభేదించే గొంతుకలను వినే ధైర్యం ప్రజా జీవితంలో ఉన్నవారికి ఉండాలని అన్నారు. Federation of Press Clubs ప్రజలకు మంచి చేయాలని ఆకాంక్షించారు.

ఫెడరేషన్ ఆఫ్ ప్రెస్ క్లబ్స్ దేశవ్యాప్తంగా జర్నలిస్టుల ఐక్యత, సంక్షేమం, పత్రికా స్వేచ్ఛ, ప్రజాస్వామ్య విలువల పరిరక్షణకు బలమైన వేదికగా ఎదగాలని ఉప ముఖ్యమంత్రి భట్టి విక్రమార్క ఆకాంక్షించారు.

షార్ట్ ఫిలిం తీసి రూ. 3లక్షలు గెల్చుకునే చాన్స్: https://site.singidinews.com/bathukamma-young-filmmakers-challenge-2026-poster-launch/